Le tunisien, champion du monde

مثلا
على سبيل الذكر لا الحصر.. احنا اللي دخلنا موسوعة غينيس للارقام القياسية
في أكبر زردة كسكسي.. وفي أكبر مطبقة في العالم.. ومن الاوائل في نسبة
الطلاق بالنسبة لعدد السكان في العالم.. ومن الاوائل في عدد الحوادث على
الطرقات في العالم ولو كان هزوا العباد اللي تجري وراء الكيران لالعاب
بيكين رانا هزينا جميع الميداليات في المسافات القصيرة والمتوسطة والطويلة
ولو كان هزينا الحراقة رانا ربحنا بيهم جميع ميداليات السباحة من تونس
لمبدروزا ولو كان هزينا كل اللي يعوموا ويغطسوا في عرقهم رانا الاوليين في
الغطس ولو كان هزينا اللي مثقلين بديونهم رانا هزينا كل ميداليات رفع
الاثقال ولو كان عملوا مسابقة للتركيز رانا ربحناها عن جدارة واستحقاق وفي
الملاكمة لو كان هزينا جماعة الخنيفري اللي يبلبزوا العروسات والفروحات
رانا تصدرنا العالم في جميع الاوزان.. من الريشة للذبابة للمتوسط للثقيل
ولو عملوا مسابقة للتصفيف رانا ربحناها.. والتمشديق والتملق والتمليق رانا
هزيناها.. ولو كان عملنا مسابقات لبعض المسؤولين البلديين اللي ما يخدموا
كان بالدز واللز وما يفهموا كان بالهمز واللمز ..رانا جينا المرتبة الاولى
ورفعنا راس البلاد عاليا.. ولو كان ندخلوا في مسابقة متاع مهرجانات نسجلوا
في غينيس للارقام القياسية بثلاثميات مهرجان من مهرجان قرطاج لمهرجان
الفلفل وبثمانية صالات سينما لعشرة ملايين ساكن وبمسرح واحد لعشرة ملايين
مواطن في الاشاعات.. الاوليين.. وفي القيل والقال ما كيفناش ثنين.. وفي
قلبان الفيستة متفوقين.. وفي التنوفيق ممتازين.. ولا أمريكا تغلبنا ولا
الصين في الشكر متقدمين.. وفي تغطية عين الشمس بالغربال الاولين.. بالنا
أطول من سور الصين.. واوسع من بحر قزوين.. وأعلى من جبال الهندوشين
وتلقانا ديما الاوليين في مخالفة القوانين.. واكثر من عندو كتف سمين.. باش
يعفس على الاولين والاخرين.. لو كان شاركوا بهاذم الكل في الالعاب
الاولمبية والبطولة الافريقية ودورة الالعاب المتوسطية رانا وريناهم العجب
وركبنا لهم العصب.. وفكينالهم البرنز والفضة والذهب.. على هذاك نقوللكم يا
مواطنين.. سامحوني.. وربي يدوم علينا هالنعمة..آمين.. يا رب العالمين

المصدر : الصباح